Student counsil (Qaganat)

House System – «Қағанат»

House System («Қағанат» жүйесі) – білім беру дәстүріндегі house model қағидаттарына негізделген, оқушыларды ортақ құндылықтар мен мақсаттар төңірегінде біріктіретін тәрбиелік-ұйымдастырушылық жүйе.

Қағанат жүйесінің басты мақсаты – оқушылардың қарым-қатынасын тек өз сыныбының шеңберімен шектемей, әртүрлі жастағы білім алушыларды бір қауымдастыққа біріктіру, мектепте өзара сыйластыққа, ынтымақтастыққа, жауапкершілікке және қолдауға негізделген жағымды психологиялық орта қалыптастыру.

Бірлік, көшбасшылық және мектеп қауымдастығы

𐰀

Бірлік пен командалық рух

Әртүрлі жастағы оқушылардың бір қағанат құрамында болуы олардың бір-бірімен жақынырақ танысуына, ортақ мақсатқа жұмылуына және командалық рухтың қалыптасуына мүмкіндік береді. Жоғары сынып оқушылары кішілерге қолдау көрсетіп, қамқорлық пен жауапкершілікті үйренсе, төменгі сынып оқушылары мектеп қауымдастығының толыққанды мүшесі екенін сезінеді.

𐰋

Көшбасшылық және жауапкершілік

Қағанат жүйесі оқушыларға көшбасшылық қабілеттерін іс жүзінде дамытуға мүмкіндік береді. Қағанат көшбасшылары мен олардың командасы ортақ жұмысты жоспарлауға, іс-шараларды ұйымдастыруға, бастама көтеруге және қабылданған шешімдер үшін жауапкершілік алуға үйренеді.

𐰠

Салауатты бәсекелестік және мотивация

Оқу жылы бойы қағанаттар академиялық жетістіктер, спорт, шығармашылық, зияткерлік сайыстар, әлеуметтік жобалар және мектеп өміріне белсенді қатысу бағыттары бойынша ұпай жинайды. Мұндай жүйе әр оқушының қабілетін танытуына мүмкіндік беріп, ортақ нәтижеге бірге ұмтылуға ынталандырады.

𐰲

Өзара қолдау және тәлімгерлік

Қағанат жүйесінің маңызды қағидаттарының бірі – «Үлкені – кішіге үлгі». Жоғары сынып оқушылары төменгі сынып оқушыларына мектеп ортасына бейімделуге, мектеп ережелері мен дәстүрлерін түсінуге көмектесіп, өз тәжірибесімен бөліседі. Осы арқылы мектепте өзара қолдау мен тәлімгерлік мәдениеті қалыптасады.

𐰑

Мектеп құндылықтары мен дәстүрлері

Әр қағанаттың өзіндік атауы, түсі, нышаны және ұраны болады. Бұл ерекшеліктер оқушыларды ортақ құндылықтар төңірегінде біріктіріп, олардың өз қағанатына және мектебіне деген мақтаныш сезімін, мектеп қауымдастығына тиесілік сезімін қалыптастырады.

𐰁

Қауіпсіз және қолайлы орта

Әртүрлі жастағы оқушылардың бірлескен қызметі өзара түсіністік пен сыйластықты нығайтады. Бір-бірін танып, ортақ командада әрекет ету оқушылар арасындағы шеттету, түсінбеушілік, буллинг пен агрессияның алдын алуға ықпал етіп, психологиялық тұрғыдан қауіпсіз мектеп ортасын қалыптастыруға көмектеседі.

Қағанат – ортақ құндылықтар кеңістігі

Қағанат жүйесі бұл – оқушылардың көшбасшылық, жауапкершілік, ынтымақтастық, өзара қолдау және әлеуметтік-эмоционалдық дағдыларын дамытатын мектеп мәдениетінің маңызды бөлігі.

Қағанат – әр оқушының өз орнын табуына, өз мүмкіндігін көрсетуіне және мектеп қауымдастығының маңызды мүшесі екенін сезінуіне мүмкіндік беретін орта.