Мектепте буллингтің алдын алу – тәрбие мен психологиялық қолдаудың маңызды бөлігі. Бұл бағытта жүйелі түрде профилактикалық жұмыстар жүргізіледі:

—          «Достық және өзара құрмет» акциясы өткізіліп, оқушыларға бір-бірін түсіну мен қолдау көрсету құндылықтары үйретіледі.

—          Психолог пен кураторлар бірлесіп тренингтер ұйымдастырады, онда балалар эмоцияларын басқару, қақтығысты бейбіт жолмен шешу және жанжал кезінде көмек сұрау дағдыларын меңгереді.

—          Әр сыныпта заман аманаты сағаттарында қосымша тәрбиелік іс-шара өткізіліп, оқушылар өз ойын ашық айтуға, өзара түсіністік орнатуға үйренеді.

—          Мектеп тарапынан құпия сенім жәшігі жұмыс істейді, бұл арқылы оқушылар өз мәселесін жасырын түрде жеткізе алады.

—          Мұғалімдер және мектеп қызметкерлеріне арналған «Буллингті анықтау және алдын алу» семинарлары өткізіліп, педагогтар ерте белгілерді байқау және дұрыс әрекет ету стратегияларын үйренеді.

Оқушыларға арналған киберқауіпсіздік ережелері :

Қазіргі заманда оқушылардың онлайн ортадағы қауіпсіздігі ерекше назарда. Мектепте киберқауіпсіздік мәдениетін қалыптастыру бағытында ақпараттық сабақтар мен бейнетүсіндірулер өткізіледі.

—          Әр оқушыға жеке мәліметтерді (аты-жөні, мекенжайы, суреті) интернетте жарияламау, күмәнді сілтемелер мен бейтаныс адамдардың хабарламаларына жауап бермеу қажеттігі түсіндіріледі.

—          Арнайы сабақтарда кибербуллинг, онлайн алаяқтық ұғымдары түсіндіріліп, нақты өмірлік мысалдар арқылы қорғану тәсілдері үйретіледі.

—          Балаларға әлеуметтік желілерде әдептілік ережелері, яғни басқа адамға құрметпен қарау, агрессивті пікір қалдырмау және ақпаратты тексеріп барып бөлісу дағдылары үйретіледі.

Ата-аналармен жұмыс түрлері

Баланың қауіпсіздігі мен дұрыс дамуы үшін ата-анамен тұрақты байланыс орнату – негізгі басымдықтардың бірі.

—          Мектепте ата-аналарға арналған семинарлар мен тренингтер өткізіліп, буллингтің психологиялық белгілері, баланың мінезіндегі өзгерістерді байқау және дұрыс әрекет ету жолдары түсіндіріледі.

—          Ата-аналарға «Балаңыздың онлайн өмірін қалай бақылауға болады?» атты ақпараттық нұсқаулықтар беріледі, онда гаджет қолдану уақыты, қауіпсіз қосымшалар мен интернет сүзгілер туралы кеңестер ұсынылады.

—          Психолог пен сынып кураторлары ата-аналармен жеке кеңес өткізіп, баланың мектептегі және үйдегі психологиялық жағдайын тұрақтандыруға көмек көрсетеді.